BJT Bhikkhupātimokkhapāḷi Home Page   Next Section

(Suddhapācittiyā - 31-40)

[BJT Vol II (I), Page 202]

Pāc 31: Āvasathapiṇḍasikkhāpadaṁ

agilānena bhikkhunā eko āvasathapiṇḍo bhuñjitabbo. tato ce uttariṁ bhuñjeyya, pācittiyaṁ.

[BJT Vol II (I), Page 210]

Pāc 32: Gaṇabhojanasikkhāpadaṁ

gaṇabhojane, aññatra samayā, pācittiyaṁ.

tatthāyaṁ samayo: gilānasamayo, cīvaradānasamayo, cīvarakārasamayo, addhānagamanasamayo, nāvābhirūhanasamayo, mahāsamayo, samaṇabhattasamayo - ayaṁ tattha samayo.

[BJT Vol II (I), Page 218]

Pāc 33: Paramparabhojanasikkhāpadaṁ

paramparabhojane, aññatra samayā, pācittiyaṁ.

tatthāyaṁ samayo: gilānasamayo, cīvaradānasamayo, cīvarakārasamayo - ayaṁ tattha samayo.

[BJT Vol II (I), Page 224]

Pāc 34: Kāṇamātusikkhāpadaṁ

bhikkhuṁ paneva kulaṁ upagataṁ pūvehi vā manthehi vā abhihaṭṭhuṁ pavāreyya. ākaṅkhamānena bhikkhunā dvattipattapūrā paṭiggahetabbā. tato ce uttariṁ paṭiggaṇheyya, pācittiyaṁ.

dvattipattapūre paṭiggahetvā tato nīharitvā bhikkhūhi saddhiṁ saṁvibhajitabbaṁ. ayaṁ tattha sāmīci.

[BJT Vol II (I), Page 230]

Pāc 35: Paṭhamapavāraṇasikkhāpadaṁ

yo pana bhikkhu bhuttāvī pavārito anatirittaṁ, khādanīyaṁ vā bhojanīyaṁ vā khādeyya vā bhuñjeyya vā, pācittiyaṁ.

[BJT Vol II (I), Page 234]

Pāc 36: Dutiyapavāraṇasikkhāpadaṁ

yo pana bhikkhu bhikkhuṁ bhuttāviṁ pavāritaṁ anatirittena khādanīyena vā bhojanīyena vā abhihaṭṭhuṁ pavāreyya: “handa bhikkhu khāda vā bhuñja vā” ti, jānaṁ āsādanāpekkho, bhuttasmiṁ, pācittiyaṁ.

[BJT Vol II (I), Page 238]

Pāc 37: Vikālabhojanasikkhāpadaṁ

yo pana bhikkhu vikāle khādanīyaṁ vā bhojanīyaṁ vā khādeyya vā bhuñjeyya vā, pācittiyaṁ.

[BJT Vol II (I), Page 242]

Pāc 38: Sannidhikārasikkhāpadaṁ

yo pana bhikkhu Editor's note: BJT, bhikkhū - printer's error.⁰³ sannidhikārakaṁ khādanīyaṁ vā bhojanīyaṁ vā khādeyya vā bhuñjeyya vā, pācittiyaṁ.

[BJT Vol II (I), Page 246]

Pāc 39: Paṇītabhojanasikkhāpadaṁ

yāni kho pana tāni paṇītabhojanāni, seyyathīdaṁ: sappi, navanītaṁ, telaṁ, madhu, phāṇitaṁ, maccho, maṁsaṁ, khīraṁ, dadhi. yo pana bhikkhu evarūpāni paṇītabhojanāni agilāno attano atthāya viññāpetvā bhuñjeyya, pācittiyaṁ.

[BJT Vol II (I), Page 250]

Pāc 40: Dantaponasikkhāpadaṁ

yo pana bhikkhu adinnaṁ mukhadvāraṁ āhāraṁ āhareyya, aññatra udakadantaponā, pācittiyaṁ.

Bhojanavaggo catuttho

BJT Bhikkhupātimokkhapāḷi Home Page   Next Section