(Suddhapācittiyā - 41-50)

[BJT Vol II (I), Page 254]

Pāc 41: Acelakasikkhāpadaṁ

yo pana bhikkhu acelakassa vā paribbājakassa vā paribbājikāya vā sahatthā khādanīyaṁ vā bhojanīyaṁ vā dadeyya, pācittiyaṁ.

[BJT Vol II (I), Page 256]

Pāc 42: Uyyojanasikkhāpadaṁ

yo pana bhikkhu bhikkhuṁ: “ehāvuso gāmaṁ vā nigamaṁ vā piṇḍāya pavisissāmā” ti. tassa dāpetvā vā adāpetvā vā uyyojeyya: “gacchāvuso na me tayā saddhiṁ kathā vā nisajjā vā phāsu hoti, ekakassa me kathā vā nisajjā vā phāsu hotī” ti. etad-eva paccayaṁ karitvā anaññaṁ, pācittiyaṁ.

[BJT Vol II (I), Page 260]

Pāc 43: Sabhojanasikkhāpadaṁ

yo pana bhikkhu sabhojane kule anupakhajja nisajjaṁ kappeyya, pācittiyaṁ.

[BJT Vol II (I), Page 264]

Pāc 44: Paṭhamarahonisajjasikkhāpadaṁ

yo pana bhikkhu Editor's note: BJT, bhikkhū - printer's error.04 mātugāmena saddhiṁ raho paṭicchanne āsane nisajjaṁ kappeyya, pācittiyaṁ.

[BJT Vol II (I), Page 266]

Pāc 45: Dutiyarahonisajjasikkhāpadaṁ

yo pana bhikkhu mātugāmena saddhiṁ eko ekāya raho nisajjaṁ kappeyya, pācittiyaṁ.

[BJT Vol II (I), Page 274]

Pāc 46: Cārittasikkhāpadaṁ

yo pana bhikkhu nimantito sabhatto samāno santaṁ bhikkhuṁ anāpucchā purebhattaṁ vā pacchābhattaṁ vā kulesu cārittaṁ āpajjeyya, aññatra samayā, pācittiyaṁ.

tatthāyaṁ samayo: cīvaradānasamayo, cīvarakārasamayo - ayaṁ tattha samayo.

[BJT Vol II (I), Page 280]

Pāc 47: Mahānāmasikkhāpadaṁ

agilānena bhikkhunā cātumāsappaccayapavāraṇā sāditabbā, aññatra punapavāraṇāya, aññatra niccapavāraṇāya. tato ce uttariṁ sādiyeyya, pācittiyaṁ.

[BJT Vol II (I), Page 286]

Pāc 48: Uyyuttasenāsikkhāpadaṁ

yo pana bhikkhu uyyuttaṁ senaṁ dassanāya gaccheyya, aññatra tathārūpappaccayā, pācittiyaṁ.

[BJT Vol II (I), Page 288]

Pāc 49: Senāvāsasikkhāpadaṁ

siyā ca tassa bhikkhuno kocid-eva paccayo senaṁ gamanāya, dirattatirattaṁ tena bhikkhunā senāya vasitabbaṁ. tato ce uttariṁ vaseyya, pācittiyaṁ.

[BJT Vol II (I), Page 292]

Pāc 50: Uyyodhikasikkhāpadaṁ

dirattatirattaṁ ce bhikkhu senāya vasamāno uyyodhikaṁ vā balaggaṁ vā senābyūhaṁ vā anīkadassanaṁ vā gaccheyya, pācittiyaṁ.

Acelakavaggo pañcamo