(Suddhapācittiyā - 61-70)

[BJT Vol II (I), Page 336]

Pāc 61: Sañciccapāṇasikkhāpadaṁ

yo pana bhikkhu sañcicca pāṇaṁ jīvitā voropeyya, pācittiyaṁ.

[BJT Vol II (I), Page 338]

Pāc 62: Sappāṇakasikkhāpadaṁ

yo pana bhikkhu jānaṁ sappāṇakaṁ udakaṁ paribhuñjeyya, pācittiyaṁ.

[BJT Vol II (I), Page 340]

Pāc 63: Ukkoṭanasikkhāpadaṁ

yo pana bhikkhu jānaṁ yathādhammaṁ nihatādhikaraṇaṁ punakammāya ukkoṭeyya, pācittiyaṁ.

[BJT Vol II (I), Page 344]

Pāc 64: Duṭṭhullasikkhāpadaṁ

yo pana bhikkhu bhikkhussa jānaṁ duṭṭhullaṁ āpattiṁ paṭicchādeyya, pācittiyaṁ.

[BJT Vol II (I), Page 348]

Pāc 65: Ūnavīsativassasikkhāpadaṁ

yo pana bhikkhu jānaṁ ūnavīsativassaṁ puggalaṁ upasampādeyya, so ca puggalo anupasampanno, te ca bhikkhū gārayhā. idaṁ tasmiṁ pācittiyaṁ.

[BJT Vol II (I), Page 352]

Pāc 66: Theyyasatthasikkhāpadaṁ

yo pana bhikkhu jānaṁ theyyasatthena saddhiṁ saṁvidhāya ekaddhānamaggaṁ paṭipajjeyya antamaso gāmantaram-pi, pācittiyaṁ

[BJT Vol II (I), Page 354]

Pāc 67: Saṁvidhānasikkhāpadaṁ

yo pana bhikkhu mātugāmena saddhiṁ saṁvidhāya ekaddhānamaggaṁ paṭipajjeyya antamaso gāmantaram-pi, pācittiyaṁ.

[BJT Vol II (I), Page 362]

Pāc 68: Ariṭṭhasikkhāpadaṁ

yo pana bhikkhu evaṁ vadeyya: “tathāhaṁ bhagavatā dhammaṁ desitaṁ ājānāmi. yathā yeme antarāyikā dhammā vuttā bhagavatā, te paṭisevato nālaṁ antarāyāyā” ti. so bhikkhu bhikkhūhi evam-assa vacanīyo: “mā āyasmā evaṁ avaca. mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya. anekapariyāyena āvuso antarāyikā dhammā antarāyikā vuttā bhagavatā, alañ-ca pana te paṭisevato antarāyāyā” ti. evañ-ca pana so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṁ samanubhāsitabbo tassa paṭinissaggāya. yāvatatiyaṁ ce samanubhāsiyamāno tam-paṭinissajjeyya iccetaṁ kusalaṁ. no ce paṭinissajjeyya, pācittiyaṁ.

[BJT Vol II (I), Page 366]

Pāc 69: Ukkhittasambhogasikkhāpadaṁ

yo pana bhikkhu jānaṁ tathāvādinā bhikkhunā akaṭānudhammena taṁ diṭṭhiṁ appaṭinissaṭṭhena saddhiṁ sambhuñjeyya vā saṁvaseyya vā saha vā seyyaṁ kappeyya, pācittiyaṁ.

[BJT Vol II (I), Page 374]

Pāc 70: Kaṇṭakasikkhāpadaṁ

samaṇuddeso pi ce evaṁ vadeyya: “tathāhaṁ bhagavatā dhammaṁ desitaṁ ājānāmi. yathā yeme antarāyikā dhammā vuttā bhagavatā, te paṭisevato nālaṁ antarāyāyā” ti. so samaṇuddeso bhikkhūhi evam-assa vacanīyo: “mā āvuso samaṇuddesa evaṁ avaca. mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya. anekapariyāyena āvuso samaṇuddesa antarāyikā dhammā antarāyikā vuttā bhagavatā, alañ-ca pana te paṭisevato antarāyāyā” ti. evañ-ca pana so samaṇuddeso bhikkhūhi vuccamāno tatheva paggaṇheyya, so samaṇuddeso bhikkhūhi evam-assa vacanīyo: “ajjatagge te āvuso samaṇuddesa na ceva so bhagavā satthā apadisitabbo, yam-pi caññe samaṇuddesā labhanti bhikkhūhi saddhiṁ dirattatirattaṁ sahaseyyaṁ, sāpi te natthi, cara pare vinassā” ti. yo pana bhikkhu Editor's note: BJT, bhikkhū - printer's error.02 jānaṁ tathānāsitaṁ samaṇuddesaṁ upalāpeyya vā upaṭṭhāpeyya vā sambhuñjeyya vā saha vā seyyaṁ kappeyya, pācittiyaṁ.

Sañciccapāṇavaggo sattamo