Mahājayamaṅgalagāthā

 

mahākāruṇiko nātho,
hitāya sabbapāṇinaṁ,
pūretvā pāramī sabbā
patto sambodhim-uttamaṁ.
etena saccavajjena
hotu te jayamaṅgalaṁ!

jayanto bodhiyā mūle
sakyānaṁ nandivaddhano
evaṁ tuyhaṁ jayo hotu,
jayassu jayamaṅgalaṁ!

sakkatvā buddharatanaṁ,
osadhaṁ uttamaṁ varaṁ,
hitaṁ devamanussānaṁ,
buddhatejena sotthinā
nassantupaddavā sabbe,
dukkhā vūpasamentu te!

sakkatvā dhammaratanaṁ,
osadhaṁ uttamaṁ varaṁ,
pariḷāhūpasamanaṁ,
dhammatejena sotthinā
nassantupaddavā sabbe,
bhayā vūpasamentu te!

sakkatvā saṅgharatanaṁ,
osadhaṁ uttamaṁ varaṁ,
āhuneyyaṁ pāhuneyyaṁ,
saṅghatejena sotthinā
nassantupaddavā sabbe,
rogā vūpasamentu te!

yaṁ kiñci ratanaṁ loke
vijjati vividhā puthū
ratanaṁ buddhasamaṁ natthi:
tasmā sotthī bhavantu te!

yaṁ kiñci ratanaṁ loke
vijjati vividhā puthū
ratanaṁ dhammasamaṁ natthi:
tasmā sotthī bhavantu te!

yaṁ kiñci ratanaṁ loke
vijjati vividhā puthū
ratanaṁ saṅghasamaṁ natthi:
tasmā sotthī bhavantu te!

natthi me saraṇaṁ aññaṁ,
buddho me saraṇaṁ varaṁ!
etena saccavajjena
hotu te jayamaṅgalaṁ!

natthi me saraṇaṁ aññaṁ,
dhammo me saraṇaṁ varaṁ!
etena saccavajjena
hotu te jayamaṅgalaṁ!

natthi me saraṇaṁ aññaṁ,
saṅgho me saraṇaṁ varaṁ!
etena saccavajjena
hotu te jayamaṅgalaṁ!