20: Girimānandasuttaṁ



right click to download mp3

 

thero yaṁ girimānando, ~ ānandattherasantikā PPV, PPV2: santike.01
sutvā tasmiṁ khaṇe yeva ~ ahosi nirupaddavo.
dasasaññūpasaṁyuttaṁ, ~ parittaṁ taṁ bhaṇāmahe.

evaṁ me sutaṁ:
ekaṁ samayaṁ bhagavā sāvatthiyaṁ viharati jetavane anāthapiṇóikassa ārāme. tena kho pana samayena āyasmā girimānando ābādhiko hoti dukkhito bāḷhagilāno. atha kho āyasmā ānando yena bhagavā tenupasaṅkami, upasaṅkamitvā bhagavantaṁ abhivādetvā ekam-antaṁ nisīdi. ekam-antaṁ nisinno kho āyasmā ānando bhagavantaṁ etad-avoca:

“āyasmā bhante girimānando ābādhiko CBhp: ābādhiko hoti.02 dukkhito bāḷhagilāno. sādhu bhante bhagavā yenāyasmā girimānando tenupasaṅkamatu, anukampaṁ upādāyā” ti.

“sace kho tvaṁ ānanda girimānandassa bhikkhuno upasaṅkamitvā, dasasaññā bhāseyyāsi, ṭhānaṁ kho panetaṁ vijjati yaṁ girimānandassa bhikkhuno dasasaññā sutvā so ābādho ṭhānaso paṭippassambheyya. katamā dasa?

1. aniccasaññā,
2. anattasaññā,
3. asubhasaññā,
4. ādīnavasaññā,
5. pahānasaññā,
6. virāgasaññā,
7. nirodhasaññā,
8. sabbaloke anabhiratasaññā,
9. sabbasaṅkhāresu aniccasaññā,
10. ānāpānasati.

1. katamā c' ānanda aniccasaññā?

idh' ānanda bhikkhu araññagato vā, rukkhamūlagato vā, suññāgāragato vā, iti paṭisañcikkhati:

rūpaṁ aniccaṁ
vedanā aniccā
saññā aniccā
saṅkhārā aniccā
viññāṇaṁ aniccan-ti.

iti imesu pañcasupādānakkhandhesu aniccānupassī viharati. ayaṁ vuccat' ānanda aniccasaññā.

 

2. katamā c' ānanda anattasaññā?

idh' ānanda bhikkhu araññagato vā, rukkhamūlagato vā, suññāgāragato vā, iti paṭisañcikkhati:

cakkhuṁ anattā - rūpā CBhp, MPP, PPV2: rūpaṁ.03 anattā
sotaṁ anattā - saddā anattā
ghāṇaṁ anattā - gandhā anattā
jivhā anattā - rasā anattā
kāyo anattā - phoṭṭhabbā anattā
mano anattā - dhammā anattā ti.

iti imesu chasu ajjhattikabāhiresu āyatanesu anattānupassī viharati. ayaṁ vuccat' ānanda anattasaññā.

 

3. katamā c' ānanda asubhasaññā?

idh' ānanda bhikkhu imam-eva kāyaṁ - uddhaṁ pādatalā, adho kesamatthakā, tacapariyantaṁ, pūraṁ nānappakārassa asucino - paccavekkhati - atthi imasmiṁ kāye:

kesā, lomā, nakhā, dantā, taco,
maṁsaṁ, nahāru, aṭṭhi, aṭṭhimiñjā, CBhp: aṭṭhi-miñjaṁ.04 vakkaṁ,
hadayaṁ, yakanaṁ, kilomakaṁ, pihakaṁ, papphāsaṁ,
antaṁ, antaguṇaṁ, udariyaṁ, karīsaṁ,
pittaṁ, semhaṁ, pubbo, lohitaṁ, sedo, medo,
assu, vasā, kheḷo, siṅghānikā, lasikā, muttan-ti.

iti imasmiṁ kāye asubhānupassī viharati. ayaṁ vuccat' ānanda asubhasaññā.

 

4. katamā c' ānanda ādīnavasaññā?

idh' ānanda bhikkhu araññagato vā, rukkhamūlagato vā, suññāgāragato vā, iti paṭisañcikkhati: bahu dukkho kho ayaṁ kāyo bahu ādīnavo, iti imasmiṁ kāye vividhā ābādhā uppajjanti, seyyathīdaṁ:

cakkhurogo, sotarogo, ghāṇarogo, jivhārogo, kāyarogo,
sīsarogo, kaṇṇarogo, mukharogo, dantarogo,
kāso, sāso, pināso, óaho, jaro,
kucchirogo, mucchā, pakkhandikā, MPP: pakkandikā.05 sūlā, visūcikā,
kuṭṭhaṁ, gaṇóo, kilāso, soso, apamāro,
daddu, kaṇóu, kacchu, rakhasā, CBhp: nakhasā.06 vitacchikā,
lohitapittaṁ, madhumeho, aṁsā, piḷakā, bhagandalā,
pittasamuṭṭhānā ābādhā, semhasamuṭṭhānā ābādhā,
vātasamuṭṭhānā ābādhā, sannipātikā ābādhā,
utupariṇāmajā ābādhā, visamaparihārajā ābādhā, PPV2: the words visamaparihārajā ābādhā are missing, printer’s error.07
opakkamikā ābādhā, kammavipākajā ābādhā,
sītaṁ, uṇhaṁ, jighacchā, pipāsā, uccāro, passāvo ti.

iti imasmiṁ kāye ādīnavānupassī viharati. ayaṁ vuccat' ānanda ādīnavasaññā.

 

5. katamā c' ānanda pahānasaññā?

idh' ānanda bhikkhu

uppannaṁ kāmavitakkaṁ nādhivāseti, pajahati, vinodeti, byantīkaroti, anabhāvaṁ gameti.

uppannaṁ vyāpādavitakkaṁ nādhivāseti, pajahati, vinodeti, byantīkaroti, anabhāvaṁ gameti.

CBhp: omits this and the following line, printer’s error.08uppannaṁ vihiṁsāvitakkaṁ nādhivāseti, pajahati, vinodeti, byantīkaroti, anabhāvaṁ gameti.

uppannuppanne pāpake akusale dhamme nādhivāseti, pajahati, vinodeti, byantīkaroti, anabhāvaṁ gameti.

ayaṁ vuccat' ānanda pahānasaññā.

 

6. katamā c' ānanda virāgasaññā?

idh' ānanda bhikkhu araññagato vā, rukkhamūlagato vā, suññāgāragato vā, iti paṭisañcikkhati: etaṁ santaṁ, etaṁ paṇītaṁ, yad-idaṁ:

sabbasaṅkhārasamatho,
sabbūpadhipaṭinissaggo,
taṇhakkhayo,
virāgo,
nibbānan-ti.

ayaṁ vuccat' ānanda virāgasaññā.

 

7. katamā c' ānanda nirodhasaññā?

idh' ānanda bhikkhu araññagato vā, rukkhamūlagato vā, suññāgāragato vā, iti paṭisañcikkhati: etaṁ santaṁ, etaṁ paṇītaṁ, yad-idaṁ:

sabbasaṅkhārasamatho,
sabbūpadhipaṭinissaggo,
taṇhakkhayo,
nirodho,
nibbānan-ti.

ayaṁ vuccat' ānanda nirodhasaññā.

 

8. katamā c' ānanda sabbaloke anabhiratasaññā?

idh' ānanda bhikkhu

ye loke upāyupādānā cetaso adhiṭṭhānābhinivesānusayā,
te pajahanto, viramati, na upādiyanto. CBhp: pajahanto viharati anupādiyanto.09

ayaṁ vuccat' ānanda sabbaloke anabhiratasaññā.

 

9. katamā c' ānanda sabbasaṅkhāresu aniccasaññā?

idh' ānanda bhikkhu

sabbasaṅkhārehi CBhp: sabbasankhāresu.10 aṭṭīyati, harāyati, jigucchati.

ayaṁ vuccat' ānanda sabbasaṅkhāresu aniccasaññā.

 

10. katamā c' ānanda ānāpānasati?

idh' ānanda bhikkhu araññagato vā, rukkhamūlagato vā, suññāgāragato vā, nisīdati. pallaṅkaṁ ābhujitvā, ujuṁ kāyaṁ paṇidhāya, parimukhaṁ satiṁ upaṭṭhapetvā, so sato va assasati, sato passasati.

dīghaṁ vā assasanto “dīghaṁ assasāmī” ti pajānāti,
dīghaṁ vā passasanto “dīghaṁ passasāmī” ti pajānāti,
rassaṁ vā assasanto “rassaṁ assasāmī” ti pajānāti,
rassaṁ vā passasanto “rassaṁ passasāmī” ti pajānāti.
sabbakāyapaṭisaṁvedī assasissāmī ti sikkhati,
sabbakāyapaṭisaṁvedī passasissāmī ti sikkhati,
passambhayaṁ kāyasaṅkhāraṁ assasissāmī ti sikkhati,
passambhayaṁ kāyasaṅkhāraṁ passasissāmī ti sikkhati.

pītipaṭisaṁvedī assasissāmī ti sikkhati,
pītipaṭisaṁvedī passasissāmī ti sikkhati,
sukhapaṭisaṁvedī assasissāmī ti sikkhati,
sukhapaṭisaṁvedī passasissāmī ti sikkhati,
cittasaṅkhārapaṭisaṁvedī assasissāmī ti sikkhati,
cittasaṅkhārapaṭisaṁvedī passasissāmī ti sikkhati,
passambhayaṁ cittasaṅkhāraṁ assasissāmī ti sikkhati,
passambhayaṁ cittasaṅkhāraṁ passasissāmī ti sikkhati.

cittapaṭisaṁvedī assasissāmī ti sikkhati,
cittapaṭisaṁvedī passasissāmī ti sikkhati,
abhippamodayaṁ cittaṁ assasissāmī ti sikkhati,
abhippamodayaṁ cittaṁ passasissāmī ti sikkhati,
samādahaṁ cittaṁ assasissāmī ti sikkhati,
samādahaṁ cittaṁ passasissāmī ti sikkhati,
vimocayaṁ cittaṁ assasissāmī ti sikkhati,
vimocayaṁ cittaṁ passasissāmī ti sikkhati.

aniccānupassī assasissāmī ti sikkhati,
aniccānupassī passasissāmī ti sikkhati,
virāgānupassī assasissāmī ti sikkhati,
virāgānupassī passasissāmī ti sikkhati,
nirodhānupassī assasissāmī ti sikkhati,
nirodhānupassī passasissāmī ti sikkhati,
paṭinissaggānupassī assasissāmī ti sikkhati,
paṭinissaggānupassī passasissāmī ti sikkhati.

ayaṁ vuccat' ānanda ānāpānasati.

 

sace kho tvaṁ ānanda girimānandassa bhikkhuno upasaṅkamitvā, imā dasasaññā bhāseyyāsi, ṭhānaṁ kho panetaṁ vijjati yaṁ girimānandassa bhikkhuno imā dasasaññā sutvā so ābādho ṭhānaso paṭippassambheyyā” ti.

atha kho āyasmā ānando bhagavato santike imā dasasaññā uggahetvā, yenāyasmā girimānando tenupasaṅkami, upasaṅkamitvā āyasmato girimānandassa imā dasasaññā abhāsi. atha kho āyasmato girimānandassa imā dasasaññā sutvā so ābādho ṭhānaso paṭippassambhi, vuṭṭhāhi cāyasmā girimānando tamhā ābādhā, tathā pahīno ca panāyasmato girimānandassa so ābādho ahosī ti.