Dhammatthavinicchayo

Bhāvanatthā



right click to download mp3

11. Catasso Paṭipadā

Vitthārasuttaṁ, AN 4.162

Catasso imā, bhikkhave, paṭipadā.

Katamā catasso?

1. Dukkhā paṭipadā dandhābhiññā,
2. dukkhā paṭipadā khippābhiññā,
3. sukhā paṭipadā dandhābhiññā,
4. sukhā paṭipadā khippābhiññā.

1. Katamā ca, bhikkhave, dukkhā paṭipadā dandhābhiññā?

{1} Idha, bhikkhave, ekacco pakatiyāpi tibbarāgajātiko hoti, abhikkhaṇaṁ rāgajaṁ dukkhaṁ domanassaṁ paṭisaṁvedeti,
{2} pakatiyāpi tibbadosajātiko hoti, abhikkhaṇaṁ dosajaṁ dukkhaṁ domanassaṁ paṭisaṁvedeti,
{3} pakatiyāpi tibbamohajātiko hoti, These three (rāga, dosa, moha) are known as the three roots (mūla) of unwholesome thoughts; rāga here is a synonym of the more usual lobha. abhikkhaṇaṁ mohajaṁ dukkhaṁ domanassaṁ paṭisaṁvedeti.

Tassimāni pañcindriyāni The five faculties are analysed in section 18. mudūni pātubhavanti:

{1} Saddhindriyaṁ,
{2} viriyindriyaṁ,
{3} satindriyaṁ,
{4} samādhindriyaṁ,
{5} paññindriyaṁ.

So imesaṁ pañcannaṁ indriyānaṁ muduttā dandhaṁ ānantariyaṁ pāpuṇāti āsavānaṁ khayāya.

Ayaṁ vuccati, bhikkhave, dukkhā paṭipadā dandhābhiññā.

2. Katamā ca, bhikkhave, dukkhā paṭipadā khippābhiññā?

{1} Idha, bhikkhave, ekacco pakatiyāpi tibbarāgajātiko hoti, abhikkhaṇaṁ rāgajaṁ dukkhaṁ domanassaṁ paṭisaṁvedeti,
{2} pakatiyāpi tibbadosajātiko hoti, abhikkhaṇaṁ dosajaṁ dukkhaṁ domanassaṁ paṭisaṁvedeti,
{3} pakatiyāpi tibbamohajātiko hoti, abhikkhaṇaṁ mohajaṁ dukkhaṁ domanassaṁ paṭisaṁvedeti.

Tassimāni pañcindriyāni adhimattāni pātubhavanti:

{1} Saddhindriyaṁ,
{2} viriyindriyaṁ,
{3} satindriyaṁ,
{4} samādhindriyaṁ,
{5} paññindriyaṁ.

So imesaṁ pañcannaṁ indriyānaṁ adhimattattā khippaṁ ānantariyaṁ pāpuṇāti āsavānaṁ khayāya.

Ayaṁ vuccati, bhikkhave, dukkhā paṭipadā khippābhiññā.

3. Katamā ca, bhikkhave, sukhā paṭipadā dandhābhiññā?

{1} Idha, bhikkhave, ekacco pakatiyāpi na tibbarāgajātiko hoti, nābhikkhaṇaṁ rāgajaṁ dukkhaṁ domanassaṁ paṭisaṁvedeti,
{2} pakatiyāpi na tibbadosajātiko hoti, nābhikkhaṇaṁ dosajaṁ dukkhaṁ domanassaṁ paṭisaṁvedeti,
{3} pakatiyāpi na tibbamohajātiko hoti, nābhikkhaṇaṁ mohajaṁ dukkhaṁ domanassaṁ paṭisaṁvedeti.

Tassimāni pañcindriyāni mudūni pātubhavanti:

{1} Saddhindriyaṁ,
{2} viriyindriyaṁ,
{3} satindriyaṁ,
{4} samādhindriyaṁ,
{5} paññindriyaṁ.

So imesaṁ pañcannaṁ indriyānaṁ muduttā dandhaṁ ānantariyaṁ pāpuṇāti āsavānaṁ khayāya.

Ayaṁ vuccati, bhikkhave, sukhā paṭipadā dandhābhiññā.

4. Katamā ca, bhikkhave, sukhā paṭipadā khippābhiññā?

{1} Idha, bhikkhave, ekacco pakatiyāpi na tibbarāgajātiko hoti, nābhikkhaṇaṁ rāgajaṁ dukkhaṁ domanassaṁ paṭisaṁvedeti,
{2} pakatiyāpi na tibbadosajātiko hoti, nābhikkhaṇaṁ dosajaṁ dukkhaṁ domanassaṁ paṭisaṁvedeti,
{3} pakatiyāpi na tibbamohajātiko hoti, nābhikkhaṇaṁ mohajaṁ dukkhaṁ domanassaṁ paṭisaṁvedeti.

Tassimāni pañcindriyāni adhimattāni pātubhavanti:

{1} Saddhindriyaṁ,
{2} viriyindriyaṁ,
{3} satindriyaṁ,
{4} samādhindriyaṁ,
{5} paññindriyaṁ.

So imesaṁ pañcannaṁ indriyānaṁ adhimattattā khippaṁ ānantariyaṁ pāpuṇāti āsavānaṁ khayāya.

Ayaṁ vuccati, bhikkhave, sukhā paṭipadā khippābhiññā.

Imā kho, bhikkhave, catasso paṭipadā.