Dhammatthavinicchayo

Buddhatthā



right click to download mp3

31. Dasa Tathāgatabalāni

from Sīhanādasuttaṁ, AN 10.21

Dasa-y-imāni, bhikkhave, Tathāgatassa Tathāgatabalāni, yehi balehi samannāgato Tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.

Katamāni dasa?

1. Idha, bhikkhave, Tathāgato ṭhānañ-ca ṭhānato, aṭṭhānañ-ca aṭṭhānato yathābhūtaṁ pajānāti. Yam-pi, bhikkhave, Tathāgato ṭhānañ-ca ṭhānato, aṭṭhānañ-ca aṭṭhānato yathābhūtaṁ pajānāti, idam-pi, bhikkhave, Tathāgatassa Tathāgatabalaṁ hoti, yaṁ balaṁ āgamma Tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.
2. Puna caparaṁ, bhikkhave, Tathāgato atītānāgatapaccuppannānaṁ kammasamādānānaṁ, ṭhānaso hetuso vipākaṁ yathābhūtaṁ pajānāti...
3. Puna caparaṁ, bhikkhave, Tathāgato sabbatthagāminiṁ paṭipadaṁ yathābhūtaṁ pajānāti...
4. Puna caparaṁ, bhikkhave, Tathāgato anekadhātuṁ nānādhātuṁ lokaṁ yathābhūtaṁ pajānāti...
5. Puna caparaṁ, bhikkhave, Tathāgato sattānaṁ nānādhimuttikataṁ yathābhūtaṁ pajānāti...
6. Puna caparaṁ, bhikkhave, Tathāgato parasattānaṁ parapuggalānaṁ indriyaparopariyattaṁ yathābhūtaṁ pajānāti...
7. Puna caparaṁ, bhikkhave, Tathāgato – jhānavimokkhasamādhisamāpattīnaṁ, saṁkilesaṁ vodānaṁ vuṭṭhānaṁ – yathābhūtaṁ pajānāti...
8. Puna caparaṁ, bhikkhave, Tathāgato anekavihitaṁ pubbenivāsaṁ anussarati, seyyathīdaṁ: ekam-pi jātiṁ, dve pi jātiyo, tisso pi jātiyo, catasso pi jātiyo, pañca pi jātiyo, dasa pi jātiyo, visam-pi jātiyo, tiṁsam-pi jātiyo, cattārīsam-pi jātiyo, paññāsam-pi jātiyo, jātisatam-pi, jātisahassam-pi, jātisatasahassam-pi, aneke pi saṁvaṭṭakappe, aneke pi vivaṭṭakappe, aneke pi saṁvaṭṭavivaṭṭakappe: amutrāsiṁ evaṁnāmo, evaṁgotto, evaṁvaṇṇo, evam-āhāro, evaṁsukhadukkhapaṭisaṁvedī evam-āyupariyanto; so tato cuto amutra udapādiṁ, tatrāpāsiṁ evaṁnāmo, evaṁgotto, evaṁvaṇṇo, evam-āhāro, evaṁsukhadukkhapaṭisaṁvedī evam-āyupariyanto, so tato cuto idhupapanno ti, iti sākāraṁ sa-uddesaṁ anekavihitaṁ pubbenivāsaṁ anussarati...
9. Puna caparaṁ, bhikkhave, Tathāgato dibbena cakkhunā visuddhena atikkantamānusakena satte passāmi cavamāne upapajjamāne, hīne paṇīte, suvaṇṇe dubbaṇṇe, sugate duggate, yathākammūpage satte pajānati: Ime vata bhonto sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṁ upavādakā, micchādiṭṭhikā micchādiṭṭhikammasamādānā, te kāyassa bhedā, paraṁ maraṇā, apāyaṁ duggatiṁ vinipātaṁ nirayaṁ upapannā; ime vā pana bhonto sattā kāyasucaritena samannāgatā, vacīsucaritena samannāgatā, manosucaritena samannāgatā, ariyānaṁ anupavādakā, sammādiṭṭhikā, sammādiṭṭhikammasamādānā, te kāyassa bhedā, paraṁ maraṇā, sugatiṁ saggaṁ lokaṁ upapannā ti. Iti dibbena cakkhunā visuddhena atikkantamānusakena satte passati cavamāne upapajjamāne, hīne paṇīte, suvaṇṇe dubbaṇṇe, sugate duggate, yathākammūpage satte pajānāti...
10. Puna caparaṁ, bhikkhave, Tathāgato āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati. Yam-pi, bhikkhave, Tathāgato āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati, idam-pi, bhikkhave, Tathāgatassa Tathāgatabalaṁ hoti, yaṁ balaṁ āgamma Tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.

Imāni kho, bhikkhave, dasa Tathāgatassa Tathāgatabalāni, yehi balehi samannāgato Tathāgato āsabhaṁ ṭhānaṁ paṭijānāti, parisāsu sīhanādaṁ nadati, brahmacakkaṁ pavatteti.